Oftringen - Media Markt (unplugged)
| 1. November 2008 | ||
| 11:00 |
Huch, früeh isches gsi (oder het sich`s emu agfüehlt) wo mir üs am Morge am 9i z`Thun troffe hei. Auso Kusi sini Ouge hätet dr söue gseh ☺ Gesichter asiens… ☺
Aber egal, mir hei nid chönne lauere – e stränge Tag isch üs bevor gstange. Nämlech grad zwöi Unplugged Konzärt. Ds erschte isch scho am eufi agseit gsi, u zwar im Media Markt Oftringen. Auso hei mir üs ufe wäg gmacht. Mir, das heisst i däm spezieue Fall: Kusi, Rolf u Ig (schibä). Dr Ändu isch no mitem DJ Bobo z`Dütschland gsi, het auso nid chönne derbi si, u dr Bregy u dr Maso hets nid unbedingt brucht, wüu`s „nume“ Unplugged isch gsi.
Item, mir si auso schön tuckerlet u zwar zersch mau nume bis uf Muri. Dört hei mer Ruedi no schnäu ufglade u si när witer uf Oftringen.
Womer si acho hets auso verusse nid viu meh gha aues es riiese Outo-Ghetto u viiiu z`viu orangegi Manöggeli wo nüt gschiders hei z`tüe gha, aus enang gägesitig dr Vortritt z`näh. Kene het genau e Ahnig gha was louft… macht o nüt, de isch kene tschuld wes chlepft ☺
Aber mir si emu heil bim Hingerigang vom Media Markt acho, u hei eigenltech nachere Churzinspektion vor Lag o grad diräkt afa uslade. Viu hets ja auso würkli nid z`tüe gäh: Zwe Heilsarmeekarabiner, e Miniusfüehrig vo Rolf sim Schlagzüg, zwe Barhocker, zwöi Kabel u guet… los von Rom… DAS isch no effiziänts schaffe liebi Lüt ☺
Ja, när hurti ufsteue, öpe no es Käfeli u es Zigarettli u när scho grad Hopp dr Bäse. 30min aextra Unplugged. Auso i bimer am Afang scho bau chli vorcho wine Strassemusiker – eifach eine mit Glück, wüu d`Lüt si auso tatsächlech blibe stah, u hei üsem Tribe es Paar Songs zueglost…
Aber so schnäu wimer hei ufgsteut gha, isch die Haubstung o scho wider düre gsi, u mir hei üser sibe Sache (viu meh sis de würkli nid gsi) ume zämepackt u hei aus wider im Outo verstout… när no schnäu es Bäi bäi Käfeli mit dr Filialleiterin, u scho simer wider verschwunde gsi…. ufem Wäg, zrügg nach Muri…
