Aextra

… Innert nürzlicher Frischt simer auso o früsch, munter u meh aus pünktlech z`Muri itroffe. U hie das selbe in Grün grad nomau.
Womer d`Miniprozedur vom Ufsteue u dr Minisoundcheck hei düre gha, heimer doch langsam es Hüngerli verspürt. Aber da ds Media Markt Team vo Muri schöni Sandwich hei parat gha, heimer nid grad ganz müesse verhungere. U dene wo das nid glängt hätt, die hätte verusse am Würschtlistand no chönne e Bratwurscht ifresse fürne Stutz… chame nüt säge ☺ i gloube die si nid so günschtig gsi wüu dr Media Markt Geburtstag het gha, sondern wüu sie mit Sicherheit hei gwüsst, das Musiker wärde awäsend si ☺ da Chasch nid wie am Schuttmätsch gane Füfliber verlange ☺
Nei ke Seich…

Wo simer blibe stah… ah ja klar, bim ässe. Nachem ässe heimer widerum schnäu es Närvositäts Zigarettli vernichtet u när simer o scho wider uf dr Bühni gstange – respektive ghocket… isch ja Unplugged gsi, da chames e chli gmüetlecher näh ☺

Z`Muri isch dr Standort vor Bühni scho chli weniger Ideal gsi, nämlech grad unmittelbar bim Usgang. Das wär när abe de die Szene vom Strassemusiker OHNI Glück, wo die meischte Mönsche eifach verbi watschle… guet, würdi o… schliesslech hei ja die Lütlis hei wöue ga dr neu Flatscreen-HD-hyper-Hightech- dä mit dr grössere Diagonale-Fernseh irichte ☺
Item, mir hei üs gloub tapfer gschlage, u trotz em Standort het auso o das Konzärtli Spass gmacht für üs u die Lüt wo trotz neuer Kafimaschine schnäu si blibe stah ☺

Womer aues wider hei verruumt gha simer no schnäu ufn Erkundigstour düre Lade u hei üs när so uf di vieri oder so wider verabschidet u hei dr Heiwäg i Agriff gno…

Das ischs wider gsi, mit Trix und Gägs… Tschau zäme… ☺
schibä

Dieser Beitrag wurde vor am Friday, 17. October 2008 um 09:08 Uhr veröffentlicht und unter Tour gespeichert. Sie können Kommentare zu diesem Eintrag über den RSS-2.0-Feed verfolgen. Sie können einen Kommentar hinterlassen oder einen Trackback von Ihrer Website hierher setzen.