Zürich - Festival Hauptbahnhof
| 30. April 2005 |
Zwöi Konzärt a eim Tag hei ei entscheidende Vorteil: „zwei Fliegen auf einen Streich“, emu was z`Tourtagebuech abelangt 
E wunderschöne Tag im April (emu no knapp), d`Mönsche hei sich gärn gha u d`Vögu hei zwitscheret… auso eigentlech e idyllische Tag wie usen Biuderbuech – bis am viertuvor Zähni. Denn hei mir üs bim Bus troffe. Das an sich wär ja no kes Problem, aber säg nie amne Musiker, daser scho am nüni muess ufstah…:-) Nenei, es chlises Witzli am Rand…:-)
Äbe, mir si losgfahre, zersch richtig Züri HB. Womer si acho hei mer afang mau müesse luege, wo dasmer überhoupt chöi parkiere, wüus ume HB um öpe 2 Parkplätz het, u die si no vo Taxis bsetzt. Aber o das Problem isch schnäu us dr Wäut gschafft gsi…
Mir hei när einisch meh afa usruume, ufsteue u soundcheck mache. Womer si fertig gsi, isches o nüm so lang gange, u d`Türoffnig isch gsi u mir si scho gli uf dr Bühni gstange.
Isch ja schono geil gsi, mau ire Bahnhofshalle z`spile, wüu dert wird me süsch eher usegschmisse weme läärm macht, so mit de Wort: „Grüezi, min Name isch Bünzli. Ich bi da für d`Sicherhäit zueständig, und würd sie doch bitte öisä Bahnhof unverzüglech z`verlah…“ – „Wie? Mini Blockflötemusig isch doch es kulturells Guet, u bedarf ere bsungere Pfleg?“ – „Ja scho, aber wüssed sie, d`Sicherhäit!“… u.s.w
Cha mir eine erkläre, wie sone Strassemusiker chönnt d`allgemeinheit gfärde? Item, öpis muess ja cho…..
Uf jede Fall hei mir unghinderet die Halle mit no meh Hall chönne fülle. Es het auso scho chli schreg tönt, aber üse Ruedi het no jedes Problem glöst…:-)
Nachere Stung isch fertig gsi mit aextra, u mir hei sofort abgruumt u i bus igruumt. So, z`erschte Konzärt wär auso verbi gsi…
U plötzlech, mi het ja fasch dr Schlag troffe… faht doch eine uf dr Bühni a, öpis z`versage mitere trennschibä. Emu so hets tönt. I ha chli fragendi Blicke id Rundi gworfe, bis eine het klargsteut: „Nänäi, das isch d`Claudia vo de Musicstars“…. ach sooooooo. UPS!!!
Enu, i ha no fasch dänkt e Trennschibä tönt chli angers, b… isch ja glich…!
Mir hei när sofort los müesse, ab ids Bärner Oberland – Richtig Reichenbach.
O dert simer pünktlech acho, u no bevor mer irgendöpis hei müesse schaffe hets afang mau z`Nacht gä! Yesss, so söts eim immer ga…:-)
Aber o das isch mau verbi gsi, u när hets gheisse: Apacke, uslade, ufsteue, linecheck!!!
Da mir ja langsam wider es igspiuts Team si, het das o rassig klappet. Eifach Rolf het nid so möge. Gringweh, Schlächt… das isch chli e doofi Diagnose voremne Konzärt, aber ändere chames nid. Är het sech uf jede Fau zu üsere Erliechterig etschide, das Konzärt glich z`spile, und im Notfall eifach hingerem Schlagzüg….dir wüsset scho!
När dä Momänt womer ufd Bühni si… Eifach geil. Huere viu Lüt, cooli Stimmig, eifach Hammer. U ds beschte isch, das het sich düre zoge bis am Schluss!!! So isches no geil uf dr Bühni z`stah! Aber wies haut so geit im Läbe, o das geit mau verbi, u mir hei nach angerhaub Stung wider müesse Abschied näh, u hei zue tuckerle…
Fazit: Zwöi Konzärt a eim Tag! Isch hert, aber es het sich meh aus nume glohnt. Vor auem wäg dr Handwärkerin z`Züri im HB…:-)
