Zofingen - Aargauisches Kantonalturnfest
| 24. June 2005 |
Einisch meh e Tag wie usem Biuderbuech, u aextra wider uf dr Strass richtig
Konzärt. Dasmau isch Zofige ufem Tourplan gstange. Das isch extrem gäbig
gsi, wüu mer nume öppe es Stündli hei müesse Outofahre, u das isch bi dere
Hitz aube no gäbig!
Womer si acho het nämlech schones Zäut uf üs gwartet, wos nume ganz schüch
warm isch gsi, aber zum Glück hets e chli Dürzug gha, so isches einigermasse
erträglech gsi!
Mir hei sofort afa uslade, ufsteue u Soundchecke. Chli Kabu sueche, Mikrofon
flicke u züg umstecke, aber am Schluss isch emu aues gloffe.
Diräkt nachem Soundcheck heimer chönne ga ässe. U wüu das es Turnfescht
isch gsi, heimer natürlech ire Turnhaue gässe – ja gäu, e chli Sport muess si!!!
Das het sech o Maso gseit, u het no schnäu müesse d`Chlätterwand ueche
kracksle… jedem das seine:-)
Nachem Znacht heimer no chli Zyt gha d`Zyt z`gniesse u dr Buch z`brüne,
bevor mer am achti uf d`Bühni si. Am Afang hets no nid so viu Lüt gha,
was allerdings nid würklech verwunderlech isch gsi, wüu`s haut eifach immer
no rächt warm isch gsi, und`s eifach nume schön isch gsi zum dusse höckle.
Aber im Verlouf vom Gig si immer meh Lüt ids Zäut cho gügsle, wär de da
so Luti Musig macht, u bis am Schluss heimer e richtegi Pary am Start gha!!!
Super Sach gsi, haut eifach widermau chli sehr heiss, aber das simer ja
mitlerwile gwöhnt vo de letschte Konzärt:-)
Frei nachem Motto: Zum Glück isch wider Summer!!!
Ds chaute Mineralwasser usem Chüelschrank im Backstage Bereich u ds
früsche T-Shirt si drum de o DIE Erlösig gsi. Aber dr Schweiss isch auso
no nach ere Stung nume so gloffe! Aber chum heimer iglade gha, isch
so z`richtige Summergwiter über z`Land zoge, u het di nötigi abchüelig
bracht…
Fazit: Es witers heisses Konzärt, i aune Pünkt!!! Danke Zofige!
