Werdenberg SG – Reithalle – Radio Ri Party
| 26. November 2005 |
„Werden… wiviu?“ – „werdenberg… weisch das isch e Ort im Rheintal“ –
„ahaaa…“ So oder ähnlech het`s öpe tönt, womer ds erschte mau hei
dä Name uf üsem Tourplan gläse. Aber mir si natürlech schnäu amne
PC ghocket, u hei gwüsst wo das isch… u vor auem wie lang mer dert
häre z`fahre hei… 3 Std in etwa… huch… scho wider Hirzel. Aber was
macht me nid aus, für nes geils Konzärt.
Mir si auso ume Mittag (das seit ja scho aus) z`Thun abgfahre richtig
Rheintal. Nach emne Zwüschehalt, und emne churze (är isch würkli
nid läng gsi) umwäg simer emu no bi Tagesliecht in Werdenberg acho.
U wie immer heimer afang mau e Lagecheck gmacht, u scho grad
feschtgsteut, dases im Backstage-Bereich öpe haub so warm isch, wi
i mim Chüelschrank dahei… aber zum Glück si da ono es paar vo dene
„Judihuiii i cha d`Terasse vo mir Gartebeiz no e Monet länger offe
ha“- Heizstrahler umegstange. Die Sieche gäbe würkli no warm. Kusi
het emu müesse ufpasse, das sini Frisur nid kabutt geit…:-) Dä
unvorstellbar Glatze-glanz… ungloublech u unerreicht…:-)
So, wo simer gsi…. Äbe, bim Lagecheck. U was isch när cho? Wie?
Uslade? Genau! Vo wo hesch itz das gwüsst? 
Auso so schnäu heimer
no säute die ganzi Sach usem Bus gha. Chönt das a de Summerleche
(-)100°C lige? Äuä scho…
När ume Soundcheck, ässe, interview mit Radio Ri (es riise Merci übrigens
em Radio Ri Team – Dir wüsst für was!!!), isinge… was haut aues so
derzue ghört. U irgendwenn isch dr Momänt cho, u mir si ufd Bühni. U was
hie no speziell isch gsi, isch d`Liveübertragig uf Radio Ri. Isch immer
chli es gspässigs Gfüel, weme dänkt, dass da amne Grosi irgendwo im
Rheintal grad dr Radio um d`Ohre flügt, we Ändu so richtig id Saite längt…
aber was sölls…:-)
Es isch uf jede Fall e hammer Party gsi. Guet wie chönts o angers si, ire
RITHALLE… (ja isch ja guet…es git besseri, aber äbe:-) ….). U womer
si fertig gsi mit Rocke heimer sofort ume abgruumt. Zum einte si
d`Manne vo Mash scho ungeduldig bereit gstange, u zum angere hei
mer üs au ufe Heiwäge wöue mache… mir si emu no vorem Morgegraue
ume dahei gsi…;-)
Fazit: Hört das Grosi Radio im Rheintal, wird’s bei nicht einhalte des
Sicherheitsabstandes fatal… (isch o nid viu besser – i weiss. Aber är
reimt sech…;-))
