Visp - Powermesse
| 14. May 2005 |
Wallis, Maso, Autoverlad, Wein, Visp. Jaja, aues schlagwort, wo hand u
stichfescht zu üsen Nachbarkanton ghöre. U genau drum hei mir üs ja o
scho sit Wuche, we nid Monate uf dä Gig gfröit. Nid z`letscht, wüuer grad
vor dr Hustüür vo Maso über d`Bühni gange isch. Visp Powermesse, dr
zwöitgröscht Event im Wallis näbscht em Open Air Gampel! (hei mer üs
zmingscht la säge).
Mir hei üs ume Mittag ume mau bim Bus troffe für richtig Kanderstäg ufzbräche,
wüu dert hei mer üsi Öiteli ufe Zug umbige u si vo dert us richtig Goppestei
tunelisiert. Da ja Visp nid so wit wäg isch vo Goppestei heimer o nid sone wite
Wäg vor üs gha, u si dämentsprächend guet ir Zyt gsi, womer ir Litternhalle si
acho. Auso so wie das dert inne het usgseh, isch o am Vorabe Littern-wis
Walliser Wy oder ähnlechs gflosse, aber das kennt me ja nid viu angers vo so
Events här…:-)
Läck mir hei mir viu Zyt gha bim Soundcheck! Das fägt äbe no, de chame no
chli pröble u so, bis eifach aues stimmt! U nachem Soundcheck heimer o scho
grad ane Bar wo langsam am uftue isch gsi chönne ga z`Apéro ha. Das isch
immer schön so Sache?
O dasmau heimer nid so wit müesse für ga z`ässe. Nume grad über d`Strass,
u scho simer im Resti ghöcklet. Es feins Rahmschnitzel mit aständig viu
Sauce – wie sich das ghört!!! Nachem ässe hei dr Ändu und ig no schnäu
es Interview gä bi Radio Rottu, em Lokalradio vor Ort. U wo das verbi isch
gsi, simer langsam mau ufd Suechi nach Maso. Hmmm, itz het är mau Lüt
kennt!!! U de wie!!!
Aber irgendwenn heimer o ihn uf d`Bühni chönne zerre. Und es het sich glohnt!
Die Walliser si doch eifach geili Sieche. Es isch zwar es paar Songlengine gange
bis si uftout si, aber derfür gäge schluss umso meh!!! Geili Lüt, geili Party…
Wallis haut!
Jaja, da isches aube nid so cool, weme d`Bühni wider muess ruume, aber o
das muess si!!! Ds Konzärt isch zwar verbi gsi, aber d`Party isch no i di
früeche morgestunde witer gange… schliesslech isch ja Pfingschte gsi, u jede
(emu di meischte) het frei gha di nächschte zwe Täg… u das het me gloub o
chönne bruuche…;-)
See you again Wallis!!!
