Thun - Mokka
| 18. March 2005 |
Äntlech isches ume so wit gsi: aextra live uf dr Bühni. Lang hei mir
uf dä ganz spezieu Tag vor Plattetoufi und em Tourstart gwartet, und
üs guet vorbereitet. Das isch ganz sicher o dr Grund gsi, wieso mir üs
am haubi Füfi im Mokka troffe hei. Mir heis emu gschafft, nüt z`vergässe,
u so isch denn o ds ganze Material mit üsem nöiie Tourbus vo Fiat ur
Züghuusgarage Spiez agfahre cho. Aui hei flissig mit apackt, wüu süsch
wäre mir äuä itze no mit uslade u ufsteue beschäftiget. Natürlech isch
aues wider chli frömd gsi, so z`erschte mau. Aber jede einzu het sich
schnäu wider mit sine sibe Sache z`rächt gfunge.
Womer öpe am achti äntlech fertig si gsi mit ufsteue u Soundcheck,
het em Päddu sis legendäre Mokka Znacht scho uf üs gwartet, u mir hei
nume no müesse zueschla… Mit volle Mäge hei mir üs när no chli d`zyt
um d`Ohre gschlage u hei chli über Gott u d`Wäut (auso eigentlech vor
auem übere Papscht) diskutiert. När ischer cho, dä magisch Momänt. Guet,
gänderet het sich zur letschte Tour eigentlech nid viu: Es isch immer
heisser worde ir Garderobe, Ruedi het immer meh Sprüch grisse u Rolf
het wider pünktlech 20 min vorem Gig afa hueschte. Du gsehsch, es isch
aues no bim aute… Ussert natürlech dr Maso… dä hätti ja fasch vergässe.
Das isch dr zwöit i üsem Klub mit länge Haar, red chli angers aus aui
angere, isch aber ganz e liebe
Äbe, dr Uftritt - Widermau si ganz e huufe Lüt ids Mokka pilgeret für
üses Konzärt cho z`lose. Aber zwöi si sogar aextra häre cho,
zum Mitsinge: D`Marina, üsi Ängu`s Stimm vor CD, u dr Semih,
Mr. Rapp himself (Danke euch beidne viu mau!!!).
Es si ganz geili (ca.) 2 Stung gsi, womer uf dr Bühni frei nachem
Motto „Dr erscht i Waud use“ hei dörfe erläbe. Guet, z`einte oder
angere isch no chli schief gloffe, u mi hets wider 2 mau vor Bühni zwickt,
aber süsch isch aus i beschter Ornig gsi.
Dr Toufakt het dr Kult-Ur-Scheriff vor Stadt Steffisburg, Pater Zäppu
vollzoge. Vo Cherzli, über d`Toufrolle bis zu Wirouch (igitt….) het är
äues us sim Tempello Unisono mit bracht. Somit isch o die eigentlichi
Toufi e überus glungni Sach gsi…
Nachem Gig, u nachem troche alege hei mir no es Paar gmüetlichi
Stunde mit chüele, rivellafarbige Getränk, bevor mir zimlech spät
langsam gäge hei zue pilgeret si.
Ich taufe dich im Namen des heiligen aextra auf den wohlklingeden
Namen „aecht“. Amen!
