Safien - Open Air Safiental
| 16. July 2005 |
Es isch sowit gsi, das Konzärt wo am witischte vo dahei wäg isch,
isch vor dr Tür gstange: ds Open-Air Safiental. Me hät fasch chönne
meine mir sige itz uf Europatour, aber es het sech schlussäntlech womer
si acho glich usegsteut, das die guete Lüt im Safiental glich no dütsch rede.
U das het üs schono grad chli erliechteret, wüu dr einzig wo jedi Sprach
redt isch Ruedi, u dä isch a däm Weekend äbe Tätschmeischter ufem
bärner Husbärg, em Gurte gsi.
Aber item, mir si emu nach ca. 3 Stung z`Chur acho, u hei no schnäu e
Zwüschehaut fürnes Interview bi Radio Grischa gmacht. Das isch grad e
willkommeni Abwächslig gsi, zu de dütsche u holändische mitstritter uf dr
Outobahn. Wahnsinn was das so abgeit uf dr Strass…
Äbe… mir si auso z`Chur gsi. U vo dert us heimer nomau e witeri
Stung ids Safiental dörfe fahre. Dörfe destwäge, wüu d`Landschaft haut
scho geil isch dört hinger, aber momou, i muess scho säge: ES ISCH HUERE
WIT!!! Aber mir si emu acho, u vorauem heimers ja scho chli kennt, wüu
mer vor 2 Jahr oscho dert hei gspiut. Mir hei eigentlech zimlech nach dr
Akunft grad chönne uslade. Mir hei nume müesse uf die Band warte, wo
grad dran isch gsi, so us Platzgründ.
Wo o ds Uslade isch verbi gsi heimer no chli di angere Konzärt gnosse, öpis
gässe u trunke, bevor mer hei chönne afa ufsteue. Da heimer scho
z`erschtmau chli Kabugliir gha, aber Problem si ja bekanntlech da zum löse
Uf jede Fau isch dr Momänt cho, womer d`Bühni ganz für üs hei gha, u mir
hei los grockt. Es isch irgendwie es luschtigs Konzärt gsi. Luschtig im Sinn vo:
es isch aues eifach angers gsi, aus normau! I has auso sogar fertig bracht
z`erscht mau i mim Läbe bimne Konzärt chischtrig z`wärde. Es isch es scheiss
Gfüel, aber i dänke das muess jede Sänger mau erläbt ha:-) Aber uf jede
Fau heimer e riise Party gha uf dr Bühni, u o ds Publikum (auso o die wo nid
uf dr Bühni si gsi:-)) hei chräftig mitgfiiret – das isch eifach so im
Bündnerland!!! Danke viumau!!!
Nachem Gig heimer eigentlech grad diräkt iglade.
Das isch o e zimlech clevere Plan gis, wüu d`Bündner chöi ja bekanntlech
nid nume Party mache…;-)
Fazit: Wes es Konzärt uds drumherum git nume eis mau, isch das ds Open-Air Safiental!
