Rubigen - Mühle Hunziken
| 3. October 2008 |
3.10.2008 – Mühle Hunziken – Tourstart
Viertu ab zwöi, Träffpunkt Proberuum. Ja auso es bitzeli närvös simer ja gloub au gsi. Tourstart, u das no ir Mühli Hunziken. Hani doch d`Wuche vorhär no grad es Konzärt gseh im Fernseh us dr Mühli… „U hüt stahni säuber dört…“ hani no so dänkt woni bi richtig Spiez gfahre. Irgendwie schreg, wüu i bi ja vorhär no gar nie i dere berüehmtberüchtigte Mühli Hunziken gsi.
Uf jede Fau si zimlech au schön pünktlech gsi zum dr Bus izlade. Geit das auso o wider los ☺ Chischtli schleppe, Kabeli rolle – Hölle… ☺
Aber punkt drü simer mitem „Hoffentlech heimer nüt vergässe“-Gfüehl im Buuch i Richtig Rubigen lostuckerlet.
Am haubi vieri simer dört o pünktlech acho, u hei grad diräkt afa uslade. Läck du mir isch das e geili Location – auso für aui die wo no nie si dört gsi, das müesster dringend nache hole!!! Item.
Zersch hei mir üse Grümpu ufgsteut u Soundcheck gmacht, u ersch när d`Jungs vo Conatiner6. Das louft immer so, dass sie ihres Zügs grad hei chönne la stah, wüu sie vor üs gspiut hei.
Wo aues isch igsteckt u ufgsteut gsi, heimers üs afang mau im Backstage-Bereich mit Brot u Chäs bequem gmacht. Schono schreg, weme dra dänkt, was für Persönlichkeite vom internationale Musiggschäft dört scho Brot u Chäs gässe hei…
Nachem Soundcheck vo Container6 (19:00Uhr) hets z`Nacht gä… Feino Lasagne mit Salat… troumhaft. I ha mi chli müesse zrügg haute, wüu mit vollem Mage singe isch nid würkli z`gäube vom Ei ☺
Ab de viertu ab sibne het sich de d`Mühli Hunziken langsam afa fülle. U es si immer meh Lüt cho. Eifach mega!!!
I hamers ar Bar im erste Stock bequem gmacht u ha dört gäm Gscheh chli zuegluegt, chli plöiderlet u schlussändlech z`Container6 glost. Wo sie si fertig gsi, het`s gheise umboue, isinge, ufwärme… u vor auem langsam aber sicher so richtig närvös wärde!!! ☺
När isch plötzlech aues zimlech schnäu gange… no schnäu e Schluck Wasser iwärfe u ab uf d`Bühni… Mann, das isch gsi wine befreiig. Ändlech hei mer di neue Songs chönne spile, ändlech wider uf dr Bühni, ändlech wider schwitze bim Musig mache… ☺
Was när i de nächschte guet 75min isch abgange isch eifach nume no geil. Wär nid derbi isch gsi, het auso definitiv öpis verpasst. Es het eifach ändlos Spass gmacht!!! Danke viu viu mau!!! Schöner hät e Tourstart chuum chönne si…
Nachem Konzärt hei mer no chli CD`s verchouft u ungerschribe, bevor mer när langsam aber sicher wider hei agfange zämeruume. Uf d`Minute gnau am haubi zwöi isch Fyrabe gsi ir Mühli Hunziken, u mir hei üs mit emne hammer Gfüehl wider ufe Heiwäg gmacht…
Bis am 6. Nov im Mokka!!!
6. October 2008 um 06:54 Uhr
Hey Jungs!
Äs isch uu huerä geil gsi. Ier rocket meh ab als Metallica u aller anderä geilä Rockbands uf därä Wält! Hammermässig!!
6. October 2008 um 12:42 Uhr
Dir sit scho eifach geili Type….
Merci viel mals für das tolle Konzert ir Mühli. Dr Patric het extrem Freud gha, dass er mit em Schibä uf d’Bühni het dörfe…. das vergisst er ganz sicher nie meh….
Ha jetz no grad tickets für am 08. November ir Postfinance Arena bstellt. Isch scho geil, dass dr DJ Bobo nach Euch o no darf spielä, smile…..
Freue mi scho uf d’Plattetoufi im Mokka….
Liebä Gruess
Steffu