Niederried b. Kallnach - Moonlight Beachparty
| 27. May 2005 |
Irgendwie isch üs dä Name ufem Tourplan doch chli bekannt vorcho… ah ja klar, dört simer uf dr letschte Tour scho mau ga verbi luege! Auso nüt wie los ids Seeland.
D`Idee wär ja nid sooo schlächt gsi, we nid üse Tourbus hät e Streik a Tag gleit, wo jedi Gwärkschaft ir Schwyz vor Niid würd la erblasse. Dr Sack isch eifach nüm agsprunge… super, u das bi schüche 30°… janu, Überbrüggigskabel schafft da immer wider Abhilf. U so isches gsi, scho nach es paar minute Outomeche isch dä ume gloffe wines Örgeli!!!
Brum brum….ab die Post!
Erwarteterwis simer nach öpe ere Stung ds Niderried bi Kallnach acho. Guet, es hätt gschider Niderried bi Sauna(ch) gheisse. Wieso? Folgendi Situation: D`Sunne steit imne zimmlech grade Winkel am Himmu. Ihri Bahn wird nid wie a angere Tage vo Wulche ungerbroche, nei, eifach Stahlblaue Himmu. Uf dr chline Ärde irgendwo näbeusse es chlises chlises Feschtzäut mit Plastikdach. Das isch doch es nätts Agriffsziel für üsi gueti Sunne! Mit angere Wort isches unger däm Plastikdach uf dr chline Ärde Sack, uhuere, brutal…(itz muessi höre, süsch chöme wüeschti Wörter…) heiss gsi. U da`s ja i somne Feschtzäut säute bis gar nie e Klimaalag het heimer unger dene Bedingige dörfe ufsteue, soundchecke, u näbebi no chli schwitze, schwitze, schwitze… Ahhhhhhh Hilfeeeee, Surstoff….Wasser…
Aber mir hei emu o das überstange:-)
Uf jede Fall heimer so gäg die Achti chönne ga Ässe. Mmmmmhhhhh fein isches gsi!!!!
Am Eufi isch du sowit gsi, mir hei die „Bühne der Hitze“ wider beträtte. Dir gloubets nid, aber es het ir Zwüschezyt scho chli möge abchüele. Guet, vilech ligt das o am chüele Bier, wo ir Zwüschezyt im Zäut gflosse isch..:-) aber das spiut ja eigentlech o ke Rolle, houptsach nüm 60°C.
Aber trotz abchüele isch d`Stimmig dr während em ganze Konzärt eher i de ungere Temperaturbereiche z`finge gsi. Eigetlech komisch – isches doch ds erscht mau so richtig Summer gsi, u aui si guet druf gsi… aber äbe, gäbemer itz mau de Temperature tschuld…:-)
Womer fertig si gsi, heimer wie immer grad abgruumt. Aber bevor mer si fertig gsi, heimer noch schnäu e chlini Rampi hinger dr Bühni em Ärdbode glich gmacht 
Ja Ruedi, friss doch no meh bim Znacht!!! 
Nenei, Ruedi cha nüt derfür. Es isch e Rampi gsi, wo nid würklech stabil bout isch gsi. Weme würd e Schoggitafele uf vier Zahnstocher lege, u e Fläsche Wy obe druf, hätt me äuä öpe ds gliche Verhäutnis…:-) so à la Motto: Mitmache zeut
I gloube schlussäntlech isches glich e glungne Abe gsi, u jede isch froh gsi, nach dere Hitz dahei no schnäu ungerem Wasserfall chönne düre z`seckle…
Me gseht sich…;-)
