Mühleturnen - Alti Moschti
| 24. April 2005 |
Es konzärt am Sunntig, u das no imne Club isch ja nid grad ds normalschte vor
Wäut. Aber mir heis irgendwo düre no luschtig gfunge…
Auso dr Tag isch wie gmacht gsi fürnes Konzärt. Eifach nüt aus am schiffe,
u wes mau chli e Rägepouse het gä, isches emu so bewölkt gsi, dasme dr
Himmu nid vomne Elefant hät chönne ungerscheide. Aber äbe…
Mir si scho rächt früe ir Moschti acho, u das isch o guet gsi. So hei mer
nämlech schön Zyt gha für ufdssteue u füre Soundcheck. Aber zersch hets
afang mau zmittag gä…
Womer au si satt gsi, hei mer afa ufsteue u umekable, bis einisch meh aues
isch gloffe wies muess.
Nachem Soundcheck heimer no chli Zyt gha für umezhocke u öpe es Wörtli
zwächsle mit üsne Verwante u Gescht.
Aber scho gli isches los gange mitem erschte Set. Me muess vilech no säge,
das me ir Moschti immer zwöi Sets macht, das heisst es Pöiseli vo ca. 30 Min…
u när isch ds Lokal no gstuelet. Auso aues e chli schreg fürne Rock-Band,
aber cool!
När het dr Abe eigentlech si Louf gno, ohni spezielleri Eigeschafte, ussert
natürlech em Publikum. Bis ufenes Paar wenigi vo fülere sorte (:-)) hei aui
ihri Stüel la Stüel si, u si flissig ufgstange zum Mitmache. Danke viumau,
das isch de geil gsi!!! We ds Publikum o es Gäschtebuech hät, würdi grad dri
schribe: Super gsi, witer so…:-)
Wo o z`zwöite Set isch düre gsi, hei mer wider chli chönne mit verschidenschte
Lüt rede u debatiere, bevor mer när hei agfange zämerume. Dank üsem
Chefarzt Pädu isch das mau wider super zackig gange (Danke viumau geile Siech!!).
Ja u när simer haut… hei! 
Bis zum nächschte mau, im gürbetau… oder so…:-)
