Luzern - ABC Mixx
| 25. March 2005 |
Dasmau hei mirs chli gmüetlech chönne nä, was ja jedem Bärner
bsungers guet gfaut. Ersch am haubi füfi hei mir müesse im ABC
Mixx Luzärn si – vergliche mit früe ufstah e Pappestiu.
Womer si fertig gsi mit acho (nachem obligate Verfahre u unschuldigi
Lüt usquetsche) hei mer ja nid schlächt gstuunet… ds ABC isch itz
eine vo de schönschte Clubs, womer je gspiut hei! Es umbouts Chino,
eifach ohni Sässle… hammer. Aber äbe, mir si ja nid dert häre
für Hitch oder so ga z`luege, sondern zum singe, basse, schläg
erzüge, pianöle u saite zupfe. Mit angere Wort zum Musig mache…
Nachem uslade isches de o scho diräkt los gange mitem Soundcheck.
Momou, langsam simer wider igspiuts Team, was ufsteue u verkable
abelangt. U so isches o nid allzu lang gange bis dr Soundcheck isch düre gsi.
Eifach Kusi het aube chli länger – wüsster, e schöni Glatze muess u schön
poliert si, u i ha mi da druf spezialisiert. Nid öpe dass dir itz uf fautschi
Gedanke chömet, aber dir wüsst gar nid für was em Pädu (das isch übrigens
dr bescht Gitarre Roudi wos git!!! Merci viumau!!!) sini Gitarre-Politur aus guet
isch… 
Wo simer gsi… ah ja, bim Ändi vom Soundcheck. Mir hei üs när no chli id
Garderobe zrügg zoge, bis mer schliesslech si ga Ässe. Ah ja, de Mayday
heimer ono chli bim Soundcheck zuegluegt. Die hei nach üs Soundcheck gha,
wüu si vor üs hei gspiut. Das macht me darum, dass dr Ufwand bim Umbou
chliner isch, u me muess de o nid aues wider nöi isteue. Aber ke Angscht:
Ruedi „Dr erscht i Waud use“ CH het no immer gnue ztüe… 
Diräkt nachem
Ässe hei o scho grad d`Mayday abgrockt. U wo de Lüt so richtig isch igheizt
gsi, hei när mir d`Bühni wider für üs chönne i beschlag nä. Eis zwöi drü vier…
u los isches gange.
Dr Club isch zwar nid ganz voll gsi, aber mir hei e rächt
geili Party dörfe erläbe. Danke Luzärn, u au dene, wo vo witer wäg si agreist.
Sit doch aues geili Sieche!!! So, itz aber fertig da. Das hets irgendwenn o uf
dr Bühni gheisse. U scho nach de Zuegabe isches wider ads abruume gange.
Läck mir, immer das Bügle, da merkt me wie me euter wird…hahahaha :-)
Abruume, Fyrabebierli trinke, heifahre, schlafe… Bis zum nächschte mau!
