Langnau i.E. - Bar- und Pubfestival
| 6. May 2005 |
Schööön, mau wider es Konzärt ir nöchere Umgäbig! Das isch vor auem us zwene Gründ sehr agnähm: erschtens muessme nid so wit outofahre, zwöitens kennt me ganz e huufe Lüt.
Mir si aus ovo Thun richtig Langnou gfahre! Mir hei üs hie wenigschtens nid verfahre, wüu mer ja uf dr erschte Tour oscho da gspiut hei. Das isch doch scho mau sehr gäbig gsi, wüu mir üs ja chli uf z`verfahre spezialisiert hei?
Aber äbe, wenigschtens einisch uf dere Tour simer uf diräktem Wäg zum Verastautigsort cho…:-)
Äbe, mir si acho. Z`Wätter isch mau wider nid uf üsere Site gsi (so rägetechnisch meini). Aber das isch ja nid witers schlimm, für das hei si ja Ishokey-Hauene bout…
Aus erschts heimer afang mau d`Garderobe bezoge, u afang mau so richtig gstuunet was da fürnes Catering isch ume gsi… alles was das Herz begeehrt… Vor Fleischplatte, übere Öpfu bis hi zum Rotwy isch aues schön ufem Tisch verteilt gsi… lecker.
Aber lang hei mer dä Ablick nid chönne gniesse, wüu scho gli hets gheisse: Uslade, ufsteue, soundchecke… ds aute Spili haut. Aber me gwöhnt sech ja bekanntlech a aues!
Chli hie schrüble, dert es bitzeli schiebe, wies haut so geit…:-)
Derfür heimer diräkt nachem Soundcheck chönne ga ässe. Jaja, dir meinet itz äbe die Fleischplatte mit Öpfuwy (oder so)… aber nenei. Ines Resti, womer nomau so richtig viu z`ässe hei uftischet becho. Hmmmmmm feinschtens, wie mer das liebe (mir hei ja aues gärn, eifach Spaghetti heimer scho zwöi drü mau gha?).
När ume dr Momänt vo de Momänte: aextra live on Stage! Angerhaub Stung heimer aues gä, für us däre Ishaue e Chochtopf z`mache, u bis am Schluss het doch das gar nid mau so schlächt funktioniert!!! Danke Langnou. Tja, Bärner haut…;-)
Aber äbe, o die schöne Momänte im Läbe gö mau verbi, u so hei o mir scho gli ume z`Fäud müesse ruume. Aber das isch o gar nid so schlimm gsi, wüu so nach angerhaubstung isch me doch rächt uf de Fälge… zmingscht mir geits aube so!
Aber o das het üs nid chönne dervo abhaute, em Abe no chli Zyt z`la, schliesslech isches ja es Bar- u Pubfestival gsi…;-)
