Islikon - Club C4
| 13. May 2005 |
Hmmm, langsam fahni a mire Geografie Biudig afa zwifle… scho ume e Ort woni no nie irgendwo gseh, ghört oder gläse ha. Aber was sölls, das macht doch sone Tour no zuesätzlech chli intressant…
O zu däm Konzärt simer frohen Mutes ufbroche, obwohl mer Outotechnisch chli hei es gstungg becho, aber o das muess mängisch si. So weiss me emu grad ume, wele vo üs dr letscht Usflug i Mc Donalds gschider hät la si…:-)
Z`Bärn no Sigi u Ruedi ilade, u scho hei mer chönne ufbräche. Mitlerwile heimer übrigens o gwüsst wo häre (nid dassder meinet mir tüenge üs nid informiere – was ja der Grund für z`Verfahre chönnt si…:-)).
Womer au si acho heimer ja nid schlächt gstuunet. Es uhuere Ding vomne Klub (dr Veranstauter het gseit: Kapazität 1250 Lüt). U dä sötte mir fülle? Hmmmmm äuä nid ganz. Aber glich, mir hei aues gä!
Wider z`aute Spili mit ufsteue, Soundcheck – alles wie immer. Fasch, we nid no z`Mischpult abgrouchnet wär…
Aber dr Heud vo däm Abe isch u blibt Rolf! Zersch chunter mau i de Finke u merkts fang, wemer scho lang im Outo hocke u när no sini Flugstunde! I bi mir ja bewusst, dass Schlagzüger wäsentlech meh chöi aus mir Sänger, aber auso so näbem Soundcheck no schnäu es Flugprevet mache wär de gloub scho grad chli übertribe. Aber was söus, är hets emu probiert, u zwar rückwärts vor Bühni (wüu dert es Gländer fäut!). Enu, derbi si u mitmache isch aues… üse Rolf het uf jede Fau z`Flugprevet o a däm abe nid becho:-) aber är het sich itz mau bir SwissHansa beworbe, wär weiss…:-)
So, wider zrügg zum wichtige – er Musig. Irgendwenn nachem Znacht isch o ds Islikon dr Momänt cho womer ufd Bühni si. Es het nid soooo viu Lüt gha wie ine hätte möge, aber das isch plötzlech o nüm wichtig gsi. Wüu die wo dert si gsi, hei eifach aues gä. Danke viumau, aues geili Sieche!!! Womer während em Konzärt hei d`Reihen zeut, simer emu immerhin uf 15 Reihene cho! U das isch ja de auso scho nid schlächt…;-)
Nachem Konzärt heimer o grad wider afa zämeruume u ilade. Das isch am gäbigschte, de isches aube grad gmacht, u me cha sich när mau uf ds heifahre konzentriere… wüu Thun isch ja nid grad ume Egge. Aber so eifach das o tönt isches nid immer…:
Mir am fahre, u plötzlech lüchtets nume no uf dr Outobahn. „Guete Abe, min Name isch Weissnümwie, Kantonspolizei Aargäu – Grosskontrolle. Chani bitte Füererschyn und Fahrzüguswiis gseh?“ – „Guete Abe, mi Name isch Knöri Rolf, Mundartband aextra. I ha nume z`Flugprevet derbi…“ hihihihh
Nei ke Seich! Mache doch die Grosskontrolle. U aui hei dörfe use ha – ussert die drü charmante Herre im Bus…;-)
Aber wo kein Problem keine Strafe (das ich es auts chinesisches Sprichwort vo mir!) – mir si au dahei acho, ohni Buess, ohni irgendöpis…
