Interlaken - Move to Rugenrock
| 26. August 2005 |
Mir hei auso scho chli bibberet, öb de ds Rugenrock o würklech
stattfindet, so vo wäge Hochwasser. Aber mir hei schlussändlech ds
O.k becho, u heinis chönne ufe Wäg mache, richtig Interlake.
Isch mau ume gäbig gsi, dasmer nid so wit hei müesse fahre.
Im verlouf vom späte Namitag, simer ufem Rugen-Areal itroffe u hei
zersch mau e Ougeschyn gno, wie de das so usgseht dert…
När heimer no müesse üses chline Füürwärch mit de Verantwortliche
bespräche, nid das öppe no öpis schief geit… u chli Interviews gä,
bevor mer hei agfange dr Bus uslade u dr Platz hinger dr Bühni i beschlag nä…
Es isch auso scho chli spät gsi, womer öpe am 10 vor 1 ufd bühni
gwatschlet si. Aber nichts desto trotz het`s gheisse: Vollgas!!!
Es het so richtig gfägt, mau wider z`spile, wes scho dunkel isch.
U drum heimer ja o üses chline Sprängstoffarsenal ufbout gha…:-) nenei,
mir hei nid wöue dr Ruge spränge, aber so chli Flämmli u so isch haut
schono geil… oder nid? 
Uf jede Fau heimer üse Uftritt so richtig chönne gniesse, u vor auem
simer froh gsi, dass sich niemer het verbrönnt… (emu i ha e chlinere
Zämeschiss igfange vom Sprängmeischter persönlech….hmmm,
me sött nid zur fautsche Zyt am fautsche Ort stah….).
Was üs am meischte gfröit het, isch dases trotz em Hochwasser
z`Interlake u im Bärner Oberland so viu lachendi Gsichter het im
Publikum gha. Me het scho gmerkt, dass d`Stimmig chli bedrückter
isch aus süsch, vor auem o hinger dr Bühni, aber das isch ja o verständlich.
Aber uf jede Fau het`s gfägt für üs, u mir hoffe doch o für aui die, wo
bis so spät am Abe/ früech am Morge hei möge warte! Danke beschtens!!!
Nachem Konzärt heimer no chli mit de verschidene Lüt gsprächlet u i
gloube wo dr letscht isch dahei gsi, isches scho chli später ir Nacht gsi…
aber das isch ja aues nume haub so schlimm, wem es weiss….:-)
Fazit: E heissi Sach – das het`s o mau brucht i däm verschiffete Summer.
Aber ke Angscht: scho ines paar Monet isch Wiehnacht, u weder ungerem
Wiehnachtsboum singet „scho gli isch wider Summer….“ Chunt das nächscht
Jahr uf jede Fau guet!!!
