Huttwil - Eishalle
| 1. April 2005 |
Einisch meh hei mir üs am Namitag mau troffe, für anes Konzärt ufzbräche.
Huttwil isch ufem Plan gstange, u ersch no i dere Halle, wo Gotthard u angeri
Bands scho hei gspiut (guet, i gibes ja zue, denn hets keni Bare dinne
gha:-)). Aber gliiiich… Ja, äbe, mir si irgendwenn nach chli Outobahn und ere
haube Wäutreis dür Ortschafte wo im Lexikon ke Platz me hei gha doch no
bim Sportzentrum Huttwil (alias Huttu) acho.
Es isch ja e wunderschöne Tag gsi, u was dörfe mir? Hä? Ine Halle wos nach
abgstangenem Bier u no nid würklech verflüchtigete Rouchschwade stinkt üsi
sibe (guet, mitlerwile het scho dr Ändu allei meh…:-)) Sächeli ga ufsteue.
DAS isch hert! Aber immerhin hets bir einte oder angere sehr innovative Bar
o e Palme gha.
Nei itz mau im Ärnscht, i bi ja nid so dr Bar u Pubfescht gänger. Aber gsehts
da nid immer chli glich us??? Si das immer di gliche Bare wo da ufgsteut
wärde?…. isch ja o glich, mir si ja nid zum suufe dert häre, sondern zum
Schaffe. Jawohl.
Übrigens, Klopfi o (är het gseit i söu Ihn hie erwähne! So schnäu isch es Bier
verdient…;-)). Äbe… mir si immer no am ufsteue gsi. Das isch aus eigentlech
rächt guet gange, bis dr charmant Herr vor PA Bude üsem guete Rüedi (dä
arm) het gseit, dass är ke Ahnig het. Auso nid Ruedi, dr anger…J Nennen wir
ihn Herr x aus y. So ufe erscht Blick heter ja no rächt lieb usgseh, aber auso
üsem Rüedi eso… weisch wini meine… isch ja o glich, wüu Herr x us y het gäge
Ruedi „dr erscht über Kanal 1 use“ (wener de geit..:-)) überhoupt ke Chance
gha. Das MUESS eifach gseit si…. Sorry. Wo simer verblibe. Ah ja: irgendwenn
im verlouf vom vortgschrittne Vorabe isch du emu o aues gange, u mir hei
d`Bühni chönne frei gä für Airbäg.
Läck mer am Arsch hei die es Züg derbi gha! Sofa, Ständer(Lampe), Pflanze…
e ganzi huere WG hei die mitgno.
Eifach entüschenderwis nume ei Frou. Das isch ja nid witers schlimm, aber das
isch doch ke Wiiber WG oder? Mit eire Frou? Oder hani da öpis fautsch
verstange? Nei ke seich… Nääär, Ässe. Lasagne hets gä, womer mit emne
ganze FC hei dörfe teile. Wär ja o nid so schlimm gsi, wüu ja de gnue kochet
wird. Aber we grad nachem FC no Kusi geit ga use nä, hesch gschisse.
De gits no chli Salat, Brot u vilech es Snickers usem Outomat. Nenei, ke
Angscht, mir hei gnue becho… Irgendwenn hei när Airbäg afa spile, u gli
drufabe mir (ufe Linecheck wetti itz nid nomau iga, gäuet Herr x us y). Isch
ganz e luschtige Gig gsi. Nei ächt, dä Blick über au die Bare isch so öpis geils,
Hammer. I dänke aui beteiligte hei Ihre Spass gha. Mir uf dr Bühni, d`Lüt im
Publikum, u au die Lütlis wo hei müesse ade Bare schaffe.
Aber es isch eifach immer z`gliche a so Barfestivals… e uuuuuhuere Hitz.
Ächt! U när wirsch no vo obe grillet u e Ventilator isch ja o no nie erfunde
worde (guet, DAS hät äuä gwüssi überforderet…gäu Ruedi;-)). Aber im
Ändeffekt muess me scho säge: Glungni Sach gsi, dä Friti abe z`Huttwil.
Danke beschtens!
