Huttwil – Rock Sound Festival
| 27. August 2005 |
Jaja, mir si schono chli müed gsi, vom Move to Rugenrock, aber das
het üs nid söue dran hindere, glich frohen Mutes richtig Huttwil ufzbräche.
Wie meischtens simer imne meh oder weniger länge Konvoi ids töifschte
Ämitau (guet, isch vilech chli übertribe, tönt aber no guet…oder nid? :-))
ufbroche.
Womer si acho, het dr Typ gseit, mir chöni diräkt näbem Schnee verbi i
Backstagebereich fahre. SCHNEEEEE? Tatsächlech, mir si am erschte
Schnee verbi gfahre… wärs nid gloubt, söu mau ds Huttwil hinger
d`Kunschtischbahn ga luege…;-)
Item… immerhin isches nid entsprächend chaut gsi! Zersch heimer afang
mau ds ganze Gländ e chli gnöier unger d`Lupe gno. Gar nid mau so übu,
was die da für d`aextra hei uf d`Bei gsteut… (Kusi het mer när gseit,
dass d`Gotthard u am nächschte Tag Status Quo ono spile). Jaja, sooo
schnäu chöi Tröim verflüge…:-)
Dr Soundcheck isch eigentlech ohni gröessere Problem über d`Bühni. Chli
lüter hie, chli lisliger dert, wies haut so geit. U scho während dene Strapaze
hei mir üs afa frage: chöme ächt da scho Lüt we mir spile? Schliesslech
heimer ja scho am früeche Namitag gspiut… Nomau schwein gha!
Womer agfange hei, hets scho ganz e huufe gwunderegi Gsichter vor dr
Bühni gha. So machts äbe no Spass!!! Guet, mir si natürlech o ir Heimat vo
Sigi gsi, u vo däm wüssemer ja daser cha feschte…;-) U das heter o uf dr
Bühni einisch meh bewise, o wener hinger sinere „Piano-Bar“ chli versteckt
isch…. Isch haut chli e schüüüche…;-)
Aber äbe, es isch mau wider hammer mässig gsi. Uf so grosse Bühnine
isches haut scho immer wider schön, vor auem, wes no so viu fröidigi
Gsichter im Publikum het!!! Nachem Gig heimer no e Outogrammstung
am Stand vo Cede.ch gha, u aschliessend no es Paar Interviews.
Dämentsprächen hungrig simer när am Abe a z`Nacht-Tisch im
Backstagebereich ghocket, u hei so richtig zuegschlage…:-)
Mir hei när no di räschtliche Bands chli gnosse, u si bi zyte ume richtig
Thun tuckerlet…
Fazit: Kommen die Leute schon am Nachmittag, trifft
aextra fasch dr Schlag…. Oder ähnlech…:-)
