Hoch-Ybrig - Open Air
| 19. June 2005 |
Früüüüüe heimer müesse ufstah für a Hoch Ybrig. Am Morge am 8i heimer üs bim bus troffe, für via Brünig-Luzärn uf Unteriberg z`fahre. Mir si über Päss, Alpe u Weideröscht gfahre, bis mer äntlech hei e Bühni, es Paar Zäut u e ganz e huufe Lüt gseh: Ds Open Air Hoch Ybrig het sich a däm Tag i sim schönschte Chleid zeigt!!! Ächt wäge üs? Gloub nid, aber schön isches glich gsi:-)
Womer si acho heimer eigentlech grad diräkt af auslade u dr ganz Grümpu hinger d`Bühni bigele. So isch das emu grad gmacht gsi, u mir hei chönne afa sünnele..:-) Es isch nämlech scho am morge am Eufi e riiiiiiise Hitz gsi ufem Gländ, u entsprächend si o d`Lüt agleit gsi… e Ougeweid:-)
Zum glück isches ir Garderobe einigermasse chüel u agnähm gsi, wüu ds Wasser isch scho churz nach dr Akunft i ströme gflosse u das het sich o dr ganz Tag nid gänderet!
Am Zwöufi het när dr Blusbueb uf dr Houptbühni sini Show zum beste gä. Mir isch hüt no nid ganz klar öb är itz Musiker oder Komiker isch. Z`eingzige woni weiss, är isch passionierte Chüngelizüchter. O bekannt aus Eidg. Dipl. Hase Ökonom…oder ähnlech:-)
Isch ja o glich. Wo är het fertig züchtet gha, hei mir chönne afa ufsteue, u Linecheck mache. Scho denn het d`Sunne stinkfräch uf d`Bühni gräschet, aber das het no söue schlimmer cho.
Womer nämlech am Zwöi ufd Bühni si, het si üs regelrächt grilliert. Süsch fraget mau Kusi, wies sire Glatze am abe isch gange?! Chunt dervo, weme söfu Gel id Haar tuet Jaun!!! 
Aber das aus het üs nid söue hindere aues z`gä! U trotz er Hitz het o ds Publikum aui erwartige a dä Tag eifach so übere Huufe gworfe. Mir hei dert sozäge e Beachparty ohni Sand dörfe fyre. Aber zum glück hei d`Verastauter chli vorusdänkt, u e Füür(u Flamme)wehrschluch organisiert, für de Lüt vor dr Bühni e chlini Abchüelig z`ermügliche. Da ha ig mit mire Super Water Mega Pump Gun scho fasch nüme chönne usrichte! Aber gfägt het si glich:-)
Ja, was heimer no gha ussert heiss… Ah ja, d`Marina. Üsi Ängu`s Stimm vom Album het üs mau wider bi La mi nid allei verstercht. Het sis nid hervorragend gmacht???!!! Danke für di Isatz Marina, u i hoffe dini Dütschprüefig am nächschte Tag isch guet cho!!!
Womer vor Bühni si het mi dünkt, es sig itz doch grad chli sehr extrem heiss. Aaaahhh isch das schön gsi i di chüeli Garderobe es troches T-Shirt ga alege… angeri nenne so sache Wiedergeburt. I säge däm eifach Die Erlösung!!!
Mir hei när no chli witer gsünnelet u Glatzene grilliert, u hei üs am früeche Abe wider ufe Heiwäg gmacht. Zum Glück im klimatisierte Outo…..
Schmelz
