Gersau - Beach-Rock-Party
| 13. August 2005 |
Mir si no immer chli müed gsi vom Vorabe dahei, aber mir hei ja derfür
mau wider so richtig chönne usschlafe. Mir hei nämlech ersch am Sächsi
müesse abfahre, i richtig Vierwaldstättersee. Eigentlech no e rächt längi
Fahrt für so amne Sunntig abe, aber das mache mir doch gärn!
Mir hei üs füre Wäg übere Brünig entschide, u mir hei hert für die
Entscheidig müesse Zahle. We de nume Care, Wohnwäge u verwundereti
Holänder vor eim här tuckerle cha sich sone Pässefahrt sehr schnäu
zumne Närvige Usflug entwickle… u so hei mir üs nach dr Akunft ds Gersou
entschide, über Luzärn-Bärn hei z`fahre – sehr e guete Plan gsi!!!
Aber item. Womer si acho hei mer eigentlech grad gässe u usglade
glichzytig. Das heisst das mitem uslade isch so schnäu gange, dases
eigentlech ussert em Pädu (dä miter Frisur) niemer het mitbecho.
Au am ässe, u d`Stagehands mit Pädu am uslade… das isch no luxuriös:-)
Aber uslade isch ja nid aus.
Nachem Ässe hei mer no chli em Famara zueglost, bevor mer widerum
hei agfange üsi sibe Sächeli z`verkable u parat z`mache.
När ume Linecheck, WC, Hopp dr Bäse.
So schnäu chas ga, u me steit scho wider ufere Bühni. Vollgas abrocke.
Das isch o z`Motto vo däm Abe gsi.
U das hei mer o gmacht. Eifach e Teil vom Publikum isch a däm Abe chli
schwirig gsi zum erreiche, aber die Angere wo hei mitgmacht, hei derfür
für öppe vier gmööget, klatschet u gumpet… u so hei mir z`Konzärt nach
chlinere Afangsschwirigkeite doch no chönne erfolgriich z`Änd füere!
U so simer nach asträngende 1,5h einisch meh sehr extrem kabutt vor Bühni
gwatschlet. När isch ume dä mitem zämeruume cho, u wo o das isch fertig
gsi, hei mir üs diräkt ufe Heiwäg gmacht – dasmau über Bärn!!! 
Ah ja,
no öppis ganz angers: was immer vergässe geit isch mau au dene wo
hinger de Kulisse bügle u schleppe es riise danke uszspräche. Das sie
die wome nie gseht, nie ghört, wos aber genau glich fescht bruucht wie
üs Kärlis wo a vordeschter Front Vollgas gäbe. Merci, Grazie, Danke a
aui Stagehands, Liechtmönsche u Tonmeischter vo dere Wäut!!!
Fazit: Was wär d`Wäut ohni Vierfach-Chlatscher und Stagehands?
Nid viu ussert Musiker… oder so:-)
