Gampel - Open Air
| 20. August 2005 |
I ha no säute i mim Läbe fröid gha am scheiss Klang vom Wecker…
Aber a däm Tag scho. Es isch ja o dr Tag gsi, wo e lang ersehnte Troum
i erfüllig gange isch: Es Konzärt uf dr Houptbühni vom Open-Air Gampel.
I hamer das bir morgentleche Prozedur es paar mau uf dr Zunge la verga…
u es het sech geil agfüelt…:-)
Mit so allgemein müede Gsichter hei mir üs a däm Morge bim Bus troffe.
Das Biud isch fasch einmalig gsi. Müed, düre, kabutt isch so zimlech jede
gsi, aber irgendwie isch no säute öper so fit gsi wie a däm Morge.
Tönt wiene Widerspruch i weiss, isch aber irgendwie verständlich…:-)
oder nid?
Mir hei üs auso ufe Wäg gmacht richtig Lötschbärg zum verlade.
Aues schön u guet, nume dases uf dr angere Site vom Loch nüt angers
het gha aus Chrisdicke Näbu. Serige Seich. Da heimer schnäu es kollektivs
Walliser-zämeschisse müesse düre gä! Was söu das? Spiusch mal z`Gampel,
u när serigs Wätter… das chas ja nid si… aber äbe, mir hei üs du glich
entschide ga z`spile u nid umzchehre…:-) u womer zum zwöite Tunnel richtig
Gampel si use cho isch plötzlech Panik ufcho…
Wo isch mini Sunnebrüue??? So geil blaue Himme (nid vouständig blau, aber
immerhin…). Het ächt da eine schiss becho, u im gheime no schnäu es
telefon ad Wätterverwautig gmacht??? Me weisses nid so gnau…:-)
Mit luter Musig u frohen Mutes simer mir so i richtig Festival-Gländ tuckerlet.
Womer si acho (a öppe tuusig Scurity-Pöschte verbi….) hei mer üs afang
mau e Überblick müesse verschaffe. Wüu ds Gampel chame sich scho nume
im Backstage-Bereich fasch verloufe… Irgendwenn heimer dr erscht Gang uf
Bühni gwagt. I ha gar nid gwüsst, das mis Härz so fescht cha schla, ohni
z`platze… oder öpis i däm Styl… Hmmm, isch no schreg. Letscht Jahr hani die
Bühni o scho gseh… eifach vor angere Site…:-) Mir hei auso afa uslade u
ufsteue. Irgendwie isch das o scho speditiver gange… simer ächt au chli düre
Wind gsi? Hmmm, chönnt doch no si…:-) Womer si fertig gsi, hets no grad
glängt für schnäu uf ds WC, u när ab die Post…
Wo üs d`Tarantinos hei agseit isch dr Adrenalinspiegel irgenwie chli sehr höch
gsi… när z`Intro, d`Band scho am abrocke… när dr Momänt wo dr
Stagemanager dr Vorhang uf d`Site schiebt… u use uf die Bühni. Mamma
mia… zum glück bini aube ono e Teil vom Intro ohni z`singe uf dr Bühni…
Ganz e huufe Lüt, d`Sunne schynt u mir uf dere Bühni. Naja, i ha eigentlech
nume druf gwartet das dr Wecker geit, u i muess ufstah… aber es sig du nüt
gsi…:-) Nach öpe 3 Minute isch aus scho verbi gsi (i tat u wahrheit wär das e
Stung gsi!!!). So churz isch mir es Konzärt nämlech no nie vorcho. Aber i
dänke das isch dr bitter näbegschmack, weme das darf erläbe…
Aber so churz wies eim o isch vorcho, isch dr gröscht Lohn einisch meh
z`Publikum gsi, dr Blick i Maso sis Gsicht (aus Walliser ds Gampel….),
u ds Wüsse dass die Sache nid jede cha gseh… Danke viumau Gampel, das
mir Teil hei dörfe si vo dim 20. Geburtstag!!! Danke aune Lüt wo das hei
müglech gmacht, danke em Publikum, danke ad Wätterverwautig!!! Womer
vor Bühni si, simer ja scho glücklech gsi… aber es hät no chli länger dörfe ga.
Aber was wosch, irgendwenn isch aus verbi, u mir hei afa zämeruume, u dr
Bus ilade…
När si no e zilete Interviews u e Outogrammstung ufem Programm
gstange, bevor mer üs so richtig hei chönne em gniesse vo däm Momänt
widme…
Fazit: Ds Gampel spile isch ja an sich scho e Troum – aber aus
einzigi Band am Samschti uf dr Houptbühni mit Sunnestrahle chönne z`spile
isch meh aus das… eifach gradios!!!
