Eschenbach - Musikevent “Meschpult”
| 19. March 2005 |
Aus „Gesichter Asiens“ hei mir üs nach de Eis bim Tourbus troffe.
Jede het irgendwie chli mitgnoh usgseh, aber das isch ja o nid viu
angers z`erwarte gsi…
Uf jede Fau hei mir d`Ehr gha, bi schönschtem Früeligssunneschyn
richtig Eschenbach (das mit LU Schiudli a de Outo…) z`tuckerle – auso
hei mir üs ufe Wäg gmacht. Es isch allerdings nid sehr lang gange,
u mir hei e Blächlawine vor üs gha, mit angere Wort, mir si im Stou
gstange… super! U das scho bim 2. Konzärt… aber was wosch: „Gring
ache u … Gas gä!“
Mit chli verspätig simer emu de glich mau no z`Eschenbach itroffe
u hei haut grad chli müesse Gas gä mit ufsteue. Das het üs zeigt,
das mir scho wider voll im Tour-Feeling drin si… es isch emu zackig
gange. Bim Soundcheck no hie e chli schrüble, u der e chli umboue,
aber o dä isch meh oder weniger ribigslos über d`Bühni.
Öpis guets het aber üsi Verspätig schono gha: unmitelbar nachem
Soundcheck hei mer chönne ga Ässe. Menu: Gmüessuppe - Nudle,
fleisch u Gmües – u eis Getränk. Fein isches gsi! Gäu Ändu?
(är muess drum immer e chli lide, aber das lömer itz…)
Nachem Ässe si mir üsere Lieblingsbeschäftigung nache gange: Warte
Nachem warte hei mer no chli gwartet, u wo das isch düre gsi, hei mer
müetlech afa warte… bis zum Konzärt. I wett ja nid säge, das mir dert
hei witer gwartet, aber unger ere Mega-Party versteit der Durchschnits
Homo Sapiens gloub scho chli öpis angers. Aber mir hei üs emu tapfer
dür üses Set gschlage, u i gloube d`Lüt hei fröid gha…;-) Nachem Gig
wider chli Rivella u scho gli isches nache gsi für gäge hei zue. Isch ja
de glich no es guets Stündli fahrt vor üs gläge…
