Einsiedeln - Ziegelei
| 21. October 2005 |
Nachdäm mir ar Rocknacht dahei hei chönne spile isches dasmau
wider chli ufene Tour de Suisse. Zersch richtig Luzärn, när übere
Hirzel bis mer nach chli meh aus 2 Std. si z`Eisidle acho.
Es isch scho dunkel gsi, u mir chli spät dran, aber aues isch no
im Rahme gsi. Hmm, a was dänkt me, weme Eisidle ghört?
Genau: ds Chloschter. Aber i bi ja scho chli verwirrt gsi, woni aus
erschts nid öppe es auts gregorianisches Gebäude us irgend emne
angere Jahrhundert ha gseh, sondern es komisches, belüchtets Gebilde
us üsere Zyt. E Sprungschanze! Super, hani chönne wüsse dass die
dert e Sprungschanze hei? Wini när us Gspräch mit Iheimische ha
usegfunge, hättis SÖUE wüsse… tja.
Mir si auso bir Ziegelei acho, u hei eigentlech grad afa uslade u ufsteue,
wüu imne Restaurant isch e Tisch reserviert gsi für üs… u scho wider nid
im Chloschter – aber immerhin näbe dran:-) Mir hei auso ufgsteut u
gsoundchecket, när simer ga ässe… feeeeiiiiiiiin – sone Cordon-Pneu
Format XXL… hammer, eifach z`viu, wie sich später uf dr Bühni het use
gsteut…:-) aber das Konzärt isch vo mire Körperliche Verfassig här eh
chli schreg gsi. Es isch mer nämlech z`erscht mau während dene zwöi
Toure passiert, dasi fasch d`Stimm hät verlore… u das isch zimlech
doof, we da eifach nüme chunt! Derbi hani mi doch vorem Gig no so
guet gfüelt… aber was wosch. Rolf hueschtet ja bekanntlich o di haubi
Lunge us sim Körper – 20min vorem gig.
Item: mir si nachem ässe gspannt zrügg id Ziegelei. Eigentlech heimer
ja dänkt, da chöm niemer. I ha gmeint di sige au uf dere
Sprungschanze…:-) aber zu üsere Freud hets doch e schöni Truppe a
üses Konzärt verschlage. U Stimmig hei die Lütlis dert obe offebar ono
gärn… isch emu e rächti Party gsi. Mit angere Wort, die längi fahrt het sich
einisch meh glohnt!!! Mir danke aune Schanzespringer u de Eisidler für
Ihri Gaschtfründschaft… Aber bekanntlich isch ja nachem Konzärt dr Abe
no nid gloffe. So heimer schnäuscht müglech wider zämepackt u hei üs
im Aschluss ufe Heiwäg gmacht…
Fazit: Eisidler gö uf ds Ganze – scho num wäg dr Schanze…:-)
