Bülach - Guss 80-81
| 15. April 2005 |
Mir si ja gspannt gsi, was da z`Bülach so uf üs zue chunt. Was natürlech
isch hert gsi, isch das mer hei müesse am Flughafe verbi fahre.
Nid öpe wägem Lärm… nei, wüu mer doch au scho lang id Ferie wette u
wemer ehrlech si doch scho lang reif für die Insel wäre. Aber janu, es
chunt ja nie e afrag vo Kos oder Mauritius…
Gömer haut uf Bülach…:-) Nei ke scheiss. Dasmau hei mir üs wenigschtens
nid gross verfahre (obwohl me da ja z`Züri nie so sicher isch…) u das isch
ja de scho grad chli e Leischtig für n`e Bärner. Aber item, mir si uf jede Fau
acho…
Wo dr Bus isch usglade gsi hei mir üs a heissgliebt Soundcheck gmacht.
Das isch immer soooo schön, wüu me aus Sänger nid so viu z`tüe het…
hihihi aber die Giele mache das immer super mässig…:-)
Wo o jedi Gitarre het tönt, jede Schlag ufds Schlägzüg isch i ruum
brätteret u jedes Kabu isch gsteckt hei mer diräkt chönne ga ässe.
U wüu mir imne Club gspiut hei mit integrierter Chuchi hei mer o
gar nid so wit müesse… nume grad zwe Meter hinger z`Mischpult.
Aber scho gli isch dr Momänt cho, wo Rolf het afa hueschte… u für die
igsässne unger öich isch ja sofort klar was das bedütet. Vom erschte
Hueschte a bis zum Konzärt geits no genau 20 min. Es isch ja nid grad e
erliechterig, we da eine so närvös hüeschtlet… aber ruchi no meä!!!
(weder dä nid verstange heit isch das nid witers schlimm…:-))
Easy… irgendwenn simer uf dr Bühni gstange, u hei einisch meh
abgrockt wine moore. Emu mir isches so vor cho! U i gloube i bi
nid allei gsi…:-) u obwohl dr Club bi witem nid isch voll gsi, hets
gfägt wine moore.
Nachem Konzärt hei mer üs no chli unger ds Volk gmischt, bevor mer
hei afa abruume, iruume u heifahre…
Suberi Sach gsi, o wemer nid hei chönne id Ferie verschwinde…;-)
